Arzu Yaqub qızı : Məkanı cənnət balamız

Xəbərlər

9.02.2025, 20:08

Arzu Yaqub qızı : Məkanı cənnət balamız - FOTO

MƏKANI CƏNNƏT BALAMIZ

Bir ana nələr düşünür,
İllərdir ümidli hələ.
Nakam qalıb arzuları,
Əllərin açıb göylərə.

Bir bacı büküb boynunu,
Erkən açan bənövşətək.
Hardasan dirəyim qardaş,
Bizi ayrı saldı fələk.

Son dəfə görmədim səni,
Şəhid olan balam mənim .
Qara düşüb üşüdünmü,
Ürəyimdə yaram mənim.

Hansı balasın düşünsün,
Bilinməz heç yara yeri.
Amansız savaşlar oldu,
Ömrümüzün qara yeri.

Nələr çəkdi ana yurdum,
İllər boyu qan ağladı.
Savaşların acısından,
Yaralı qəlb, can ağladı.

Hədsiz arzu, məhəbbətli
Böyüyünə ,Vətəninə.
Ağdamı da yağı basmış,
Anam borcum var Vətənə.

Torpağı dara düşəndə,
Yusif sarıldı silaha.
Yurd- yuva bizi çağırır,
Dayana bilmərəm daha.

Əzdi yağının başını,
Keçdi alovlardan, qandan.
Bu həyatda ən müqəddəs
Vətənimdir, bir də anam.

Gözünün yaşın sil bacı,
Muğayat ol anamdan sən.
Yurdumuz, torpaq çağırır,
Anam döyüşə gedirəm.

Keçdi döyüş yollarından
Kəlbəcərdə döyüş ağır.
Yollarına, dağlarına
Güllə qarışıq qar yağır.

Bu dağlarda bir təlaş var,
Susmur silahların səsi.
İtkin düşən şəhidimin
Bəlkə də ilk, son nəfəsi.

Bir kasıb ev, isti nəfəs,
Bir də ümidsiz ürəklər.
Bir bacı, ana qüssədə,
Dağlarda əsir küləklər.

Aybəniz ana saçını
Dağların qarından alıb.
Sevincin ürəyi sınıq,
Ömrü zülmətlərdə qalıb.

Bir şəhid harayı gəzən,
Dağların qarı əriməz.
Ana, bala gözü yaşlı,
Yusif deyər, heç kiriməz.

Səndən bir xəbər almadım,
Ürəyimdə min fikir var.
Bacın da çarəsiz qalıb,
Gözləri yollarda qalar.

Bu torpağın oğulları,
Ölümə oxudu meydan.
Çəkdiyi müsibətlərdən
Sarsılmadı Azərbaycan.

Bax 30 illik həsrətdən
Alındı zəfər qalamız.
Sinəsində zəfər gülü
Məkanı cənnət balamız.