İlqarı bir neçə cümlə ilə anlatmaq çətindir. Çünki o, özü bir az ensiklopediyadır. Nə soruşsan, haradasa bir xatirəsi, bir məlumatı, bir tanışı, bir tarixçəsi çıxır. Üstəlik, bunları elə şirin, elə baməzə danışır ki, adam bəzən düşünür: görəsən, İlqar bunu doğrudan deyir, yoxsa yenə bizi güldürmək üçün sözün arasına zarafat qatır?Bəlkə də onun ən böyük istedadlarından biri elə budur – ciddi sözü də adamı incitmədən demək.

İlqar uzun illərdir bölgələrdən yazır. Rayonların küçələrini, kəndlərin yollarını, insanların gündəlik qayğılarını, zəhmətini, sevincini, problemlərini oxucuya çatdırır. Hər bölgənin öz rəngini, öz nəfəsini görür və onu sadə, səmimi dillə yazıya gətirir. Sosial-iqtisadi inkişafdan danışanda da rəqəmlərin arxasındakı insanı unutmur. Onun yazılarında bölgə sadəcə xəritədəki bir ərazi deyil, yaşayan, nəfəs alan, sevinən və narahat olan bir məkandır.
Amma İlqarı yalnız yaxşı jurnalist kimi tanımaq azdır. O, yaxşı insandır. Yaxşı dostdur. Və dostluğun qədrini bilən adamdır.
Onun yaddaşı isə ayrıca söhbətdir. Həyatdan köçmüş həmkarlarının adlarını, söhbətlərini, zarafatlarını, xarakterlərini elə xatırlayır ki, sanki həmin adamlar bir az əvvəl yanından ayrılıblar. Hər hansı tədbirdə bir həmkarın adı çəkiləndə İlqarın yaddaşından onunla bağlı hansısa maraqlı hadisə mütləq çıxır. Və həmin an bir insanın xatirəsi yenidən canlanır.
Bəlkə də buna görə İlqarın yaddaşı təkcə özünə aid deyil. O, bir qədər də jurnalistikanın yaddaşıdır.
Bir də İlqarın baməzəliyi var. Onu ayrıca qeyd etməsək, yazı yarımçıq qalar. Çünki İlqar ciddi danışanda da adamın üzündə təbəssüm yarada bilir. Zarafat edəndə isə elə ciddi görkəm alır ki, hansının həqiqət, hansının İlqarvari yumor olduğunu ayırd etmək müşkülə çevrilir. Amma bir şey dəqiqdir: onun zarafatında ağırlıq, sözündə kin, yumorunda incitmək niyyəti yoxdur.
İlqarın baməzəliyi onun xarakterinin şirin tərəfidir. Adamı güldürür, düşündürür, bəzən də “indi bunu ciddi dedi, yoxsa zarafat elədi?” sualının içində qoyur.
Belə insanlar jurnalistikaya da, dostluğa da rəng qatırlar.
Bu gün İlqarın doğum günüdür. Ona ilk növbədə möhkəm can sağlığı, uzun ömür, ürəyincə olan günlər arzulayırıq. Qoy yaddaşında hələ çoxlu gözəl xatirələr toplansın, haqqında yazacağı çoxlu yaxşı insanlar, danışacağı çoxlu maraqlı əhvalatlar olsun.
Və ən əsası, İlqar həmişə İlqar olaraq qalsın – sözü şirin, yaddaşı iti, ürəyi geniş, dostluğu möhkəm, özü də bir az ciddi, bir az zarafatcıl, bir az da… İlqarvari!

Ad günün mübarək, əziz qardaşım!Sənin kimi adamların ömrünə illər yox, xatirələr yaraşır. Xatirələrin isə çox olsun!
Dərin hörmət və sevgilərimlə;
Şəmsiyyə Kərimova,
Əməkdar jurnalist