Həmin illərdə auditoriyalarda əyləşən gənclər gələcəyin jurnalistləri, söz adamları, cəmiyyətin informasiya daşıyıcıları olacaqlarını bəlkə də tam dərk etmirdilər. Onların hər birinin qəlbində böyük arzular, gözlərində gələcəyə inam vardı. O gənclərdən biri də İlhamə Qarayeva idi.
İlhamə xanımın jurnalistika yoluna gəlişi təsadüfi seçim deyil, sözə və həqiqətə bağlılığın təzahürü idi. O, universitet illərində yalnız peşənin sirlərini öyrənmədi, həm də jurnalistin ən böyük sərvəti olan insanlara diqqət göstərməyi, hadisələrə vicdanla yanaşmağı, cəmiyyət qarşısında məsuliyyət daşımağı mənimsədi.
1992-ci il məzunları üçün həmin dövr xüsusi bir zaman idi. Ölkəmizin taleyində mühüm hadisələrin baş verdiyi, yeni bir tarixi mərhələnin başladığı illər idi. Belə bir zamanda jurnalistika peşəsini seçmək böyük cəsarət, vətəndaş mövqeyi və fədakarlıq tələb edirdi. Çünki jurnalistin qələmi sadəcə kağız üzərində iz qoymur, zamanın yaddaşına çevrilir.
İlhamə Qarayeva da bu məsuliyyətli yolda öz dəst-xətti ilə irəlilədi. Onun üçün jurnalistika yalnız məlumat çatdırmaq sənəti olmadı. O, qələmə aldığı mövzulara insan taleyinin, həyat həqiqətlərinin işığında yanaşdı. Hər bir yazının arxasında bir insanın səsi, bir hadisənin mahiyyəti, bir cəmiyyətin düşüncəsi dayanırdı.
Bu gün illər ötüb, tələbəlik auditoriyalarından, universitet dəhlizlərindən uzaq düşsək də, o günlərin xatirəsi yenə də canlıdır. BDU-nun Jurnalistika fakültəsinin 1992-ci il məzunları üçün həmin illər həyat kitabının ən qiymətli səhifələrindəndir. O səhifələrdə müəllimlərin nəsihəti, tələbə dostlarının gülüşü, ilk yaradıcılıq həyəcanı və gələcəyə inam var.
İlhamə Qarayeva da həmin unudulmaz nəslin nümayəndəsi kimi bu gün öz peşə fəaliyyəti ilə qürur doğurur. Onun keçdiyi yol göstərir ki, jurnalistika insanın yalnız peşəsi deyil, həm də həyat mövqeyi ola bilər. Əsl jurnalist zamanın səsini eşidən, insanların sevincinə və kədərinə şərik olan, sözün məsuliyyətini dərk edən şəxsdir.
Məzun görüşləri yalnız bir araya gəlmək deyil, həm də keçmişə nəzər salmaq, illərin gətirdiyi uğurları bölüşmək, dostluq bağlarını yenidən möhkəmləndirməkdir. Belə görüşlərdə hər kəs öz tələbəlik illərinə qayıdır, gəncliyin saf duyğularını yenidən yaşayır. Bu görüşlərdə İlhamə Qarayeva kimi məzunların adı xüsusi hörmət və ehtiramla çəkilir.
Çünki insanın ən böyük qazancı onun arxasında qoyduğu yaxşı izdir. Yazdığı məqalələr, göstərdiyi peşəkarlıq, insanlarla qurduğu münasibətlər və jurnalistikaya verdiyi töhfələr İlhamə Qarayeva üçün ən dəyərli mənəvi sərvətdir.
Əziz 1992-ci il məzunları! Bu gün geriyə baxarkən görürük ki, o illərdə başladığımız yol bizi müxtəlif istiqamətlərə aparsa da, bizi birləşdirən dəyərlər dəyişməyib. Biz yenə həmin auditoriyalarda formalaşan dostluğun, müəllimlərimizin verdiyi biliklərin və jurnalistika peşəsinə olan sevginin daşıyıcılarıyıq.
İlhamə Qarayeva kimi məzunlarımız bu yolun fəxri simalarındandır. Onların uğuru yalnız şəxsi nailiyyət deyil, həm də doğma universitetimizin, jurnalistika fakültəsinin uğurudur.
Qoy illər keçdikcə xatirələrimiz daha da qiymətlənsin, dostluqlarımız möhkəmlənsin, qələm sahiblərinin sözü daim uca olsun. Çünki sözə xidmət edən insanlar zamanın yaddaşında yaşayırlar.
İlhamə Qarayeva da həmin yaddaşda öz adı, öz imzası və öz peşə sevgisi ilə yaşayır...
İlhamə xanımın bir neçə gün əvvəl ad günü olub. Şəxsi həyatımda baş vermiş hadisələrlə bağlı qrup yoldaşım haqqında bir kəlmə belə yazmamışdım. Artıq yazısı da hazırdır, təbriki də. İlhamə xanıma qrup yoldaşlarımızın adından cansağlığı və gümrah ömür, eləcə də həyat sevincləri arzulayırıq.

Daşdəmir ƏJDƏROĞLU