Hicran Fuad Əhmədli

Mənim düşüncə tərzimə görə insanda, insani keyfiyyətlər hər şeydən öndə durmalıdır.Təbii ki, hər birimiz insanıq...Amma həyatda elə insanlarda var ki, xüsusilə seçilirlər.Həm də belə insanlar dövrümüzdə barmaqla sayılacaq qədər azdır desək, yanılmarıq.Hesab edirəm ki, insan olmaq üçün göstərilən keyfiyyət dərəcəsi kifayət etmir.Məsələnin kökündə keyfiyyətlərlə yanaşı, mənəvi aləmin zəngin olması da labüddür.Bu isə bir çox insanlara yük kimi görünə bilər.Eyni zamanda məsuliyyət də tələb edir.Elə bu nöqteyi-nəzərdən də insanlar bu yükü çəkməz istəməz.İmkanlarını özünə və ya digər amillərin mövcudluğundan müəyyən istiqamətlərə yönəldə bilər...
Bir neçə il əvvəl AYB-nin Natəvan zalında tədbirə dəvətli idim.Bu zaman hörmətli ziyalımız Daşdəmir Əğdəroğlu mənə yaxınlaşıb soruşdu:"Siz Hicran Əhmədli deyilsiz?" Cavabım:"Bəli, mənəm" oldu.Elə bu an məlum oldu ki, aylar əvvəl Cəmil müəllim Zəbhulla mənim şeirimi baş redaktoru olduğu Turaztv.az saytında işıqlandırıb.Mənim isə bundan heç xəbərim olmayıb.Fb platformasında şeirimi görüb, bəyənib və məni tanımadan bu yüksək keyfiyyəti özündə təzahür etdirən nümunəvi addımı atıb.Mənə bunu hörmətli Daşdəmir müəllim ərz edəndə, bir anlıq nə deyəcəyimi bilmədim.Həm təşəkkürümün gecikdiyinə görə sözün açığı utandım, həm də insani keyfiyyətlərin azaldığı zamanda qarşımda əsil insan, əsil ziyalı, şəxsiyyət gördüm.Əlbəttə ki, indiki zaman üçün paylaşımdan xəbəriz olmaq çətin məsələ deyil.Amma hörmətli Cəmil müəllimin səssiz durması onun mənəvi aləminin böyüklüyünün göstəricisidir.

Cəmil müəllimin rəhbərliyi ilə fəaliyyət göstərən "Ədalət və həqiqət"qəzeti, "Turaztv.az.saytı məhz xalqa, millətə, eləcə də ədəbi mühitdə gənc yazarlara deyərdim ki, işıqlı bir yoldur.
O, vətənpərvərlik, ictimai-siyasi mövzulara geniş yer ayıran, milli-mənəvi dəyərlərimizi unutmayan əvəzsiz ziyalıdır.Onun mətbuatda göstərdiyi xidmətlər gənc nəslin əxlaqi və tərbiyəvi yetişməsində böyük rol oynayır.
Sözsüz, Cəmil Zəbhulla haqqında daha çox danışmaq, hətta mürəkkəbi tükətmək olar.Amma mən bu gün hörmətli Cəmil müəllimin qarşıdan gələn, ləyaqətlə xidmətində durduğu 65 ilini ürəkdən təbrik etmək istəyirəm.Onun bu şərəfli, rəngarəng ömür yollarının daha da uzun illərə getməsini arzu edirəm.Ona can sağlığı, yaradıcılıq uğurları arzu edirəm.
Hörmətli Cəmil müəllim, nə yaxşı ki, varsız! Hər zaman var olun!

ZƏBHULLA ÖMRÜ.

Şəninə təriflər söyləsəm azdır,
İşıqlı bir nurdur, bahardır, yazdır.
Qələmim deyir ki, şeirinə yazdır,
Rəngarəng ömürdür, Zəbhulla ömrü.

Gənclərə yol açan, inam yaradan,
Seçilmiş insandır, deyir Yaradan.
Misra-misra seçir ağı qaradan,
Rəngarəng ömürdür, Zəbhulla ömrü.

İnsanlıq özündən irəli durur,
Nadanlar tapanda bəzən də yorur...
Sevənlər onunla duymazmı qürür?
Rəngarəng ömürdür, Zəbhulla ömrü.

Ay Cəmil müəllim, var sizə sözüm,
Təşəkkür borcluyam elə mən özüm.
Keçdiyiz yollara baxarsa gözüm,
Rəngarəng ömürdür, Zəbhulla ömrü.