Azərbaycan musiqi mədəniyyətinin elə nurlu simaları var ki, onların səsi təkcə qulaqlara deyil, birbaşa ruhun ən dərin qatlarına nüfuz edir. Öz bənzərsiz tembri, dərin daxili mədəniyyəti və sənətə sonsuz sədaqəti ilə muğam dünyasında silinməz iz qoyan belə sənətkarlardan biri də Əməkdar artist, tanınmış xanəndə Arzu Əliyevadır. O, muğamın qədim köklərindən güc alaraq, onu müasir dövrün nəfəsi ilə birləşdirən sənət fədaisidir.



Gənc, istedadlı sənətçinin səsində Qarabağ xanəndəlik məktəbinin o qədim, məğrur və eyni zamanda həzin çalarları hiss olunur. Onun muğama gəlişi sıradan bir seçim deyil, ilahi verginin və böyük istedadın təbii təzahürüdür. Gənc yaşlarından musiqi dünyasına qədəm qoyan xanəndə Azərbaycan milli muğam sənətinin sirlərini ustad sənətkarlardan öyrənib, hər bəmdə və zildə öz fərqli dəst-xəttini yaratmağı bacarıb. Onun ifasındakı "Rast", "Bayatı-Şiraz", "Segah" kimi mürəkkəb muğamlar sadəcə texniki cəhətdən mükəmməl deyil, həm də daxili bir fəhm və fəlsəfə ilə zəngindir.



Arzu Əliyevanı dinləyərkən insanı valeh edən təkcə onun geniş diapazonlu səsi deyil, həm də səhnədəki kübarlığı, xanımlıq vüqarı və tamaşaçıya olan dərin hörmətidir. O, səhnəyə çıxdığı andan etibarən ətrafına bir ziyalılıq nuru yayır. Azərbaycan Dövlət Akademik Opera və Balet Teatrının səhnəsində canlandırdığı Leyli və digər klassik obrazlar onun təkcə böyük bir xanəndə deyil, həm də daxili dünyası zəngin aktrisa olduğunu sübut etdi. Onun ifasında Leylinin dərdi, sevgisi və fəryadı o qədər təbii və təsirlidir ki, tamaşaçı həmin mənəvi ab-havadan uzun müddət çıxa bilmir.
Bununla yanaşı, Arzu xanımın daxilində çox böyük bir səmimiyyət və xanımlıq həlimliyi gizlənib. Onun ifasındakı mürəkkəb xallar və zəngulələr insanı yormur, sanki adamın ruhuna sərin bir meh əsir. Səhnədə duranda onun sükutu da, geyimi də, tamaşaçıya baxışı da bir ağırlıq, bir ziyalılıq yaradır. O elə oturur, ya da elə dayanır ki, sanki dayandığı yer onun mənəviyyatı ilə bərabər böyüyür. Arzu Əliyevanın sığındığı muğam ocağı onun bu fədakarlığı, səhnə kübarlığı ilə daha da rəngarəng, daha da məzmunlu olur.



Arzu xanımın sənəti çoxdan ölkə hüdudlarını aşaraq dünyanın ən mötəbər konsert salonlarında əks-səda doğurub. O, beynəlxalq festivallarda, mədəniyyət günlərində Azərbaycanı layiqincə təmsil edərək, əcnəbi dinləyicilərə muğamın fəlsəfəsini, Azərbaycan ruhunun zərifliyini və zənginliyini çatdırıb. Onun səsi təmizliyin, milli kimliyin və qədim mədəniyyətin vizit kartına çevrilib.



Milli musiqi sənətimizin inkişafı və təbliği sahəsindəki səmərəli fəaliyyəti dövlətimiz tərəfindən də yüksək qiymətləndirilib və o, "Əməkdar artist" fəxri adına layiq görülüb. Lakin Arzu Əliyeva üçün ən böyük mükafat xalqın ona olan sonsuz sevgisi və ehtiramıdır. O, gənc nəslə nümunə kimi sənətkar duruşu ilə hər zaman seçilir, ucuz şöhrətdən uzaq qaçaraq yalnız və yalnız sənətin ucalığına xidmət edir.
Müasir Azərbaycan muğam sənətinin belə kübar və bənzərsiz simalarından biri, şübhəsiz ki, Əməkdar artist Arzu Əliyevadır. Onun sənət dünyası təkcə büllur avazı, geniş vokal diapazonu ilə deyil, həm də milli səhnəmizə gətirdiyi mənəvi ucalıq, ziyalılıq və kübar xanımlıq meyarları ilə seçilir. Arzu xanım muğam xəzinəmizin XXI əsrdəki ən güclü və etibarlı keşikçilərindən biridir.



Arzu Əliyeva Azərbaycan xanəndəlik sənətinin bu gününü bəzəyən və gələcəyinə işıq saçan bir incidir. Onun ifa etdiyi hər bir təsnif, hər bir qəzəl tarixin yaddaşına köçür. İllər keçəcək, lakin onun o saf, büllur avazı, sənətə gətirdiyi nəzakət və ləyaqət hər zaman muğamsevərlərin qəlbində yaşayacaq.
Yaxşı ki varsınız, milli musiqimizin nurlu səsi!
Daşdəmir ƏJDƏROĞLU