Gündəlik həyata bir neçə sadə və faydalı vərdiş əlavə etməklə insultun yaranma riskini əhəmiyyətli dərəcədə azaltmaq mümkündür.

“Qafqazinfo” xəbər verir ki, bu barədə kardioloq Anastasiya Poskakalova məlumat verib.

Həkim insultdan qorunmağın əsas yollarını və riayət edilməsi vacib olan qaydaları diqqətə çatdırıb.

Mütəxəssis bildirib ki, duz istehlakını və tərkibində yüksək miqdarda doymuş, həmçinin transpiylər olan qidaları məhdudlaşdırmaq şərtdir.

Bu qrupa kolbasa məhsulları, fastfud, çipslər, qənnadı məmulatları və yağlı ətlər daxildir.

Kardioloq arterial təzyiqi müntəzəm olaraq ölçməyi və nəticələri xüsusi bir gündəliyə qeyd etməyi məsləhət görür:

“Əgər təzyiq 135/85 mm civə sütunundan yuxarı qalxarsa, ürək xəstəliklərini vaxtında aşkar etmək üçün mütləq kardioloqa müraciət edilməlidir”.

Həkim vurğulayıb ki, insultun profilaktikası üçün alkoqol və siqaretdən, o cümlədən elektron siqaret və tütün qızdırıcı sistemlərdən tamamilə imtina etmək kritik əhəmiyyət daşıyır.

Bununla yanaşı, insult riskini minimuma endirmək üçün yuxu rejiminə riayət etmək, fiziki aktivliyi artırmaq və müntəzəm olaraq həkim müayinəsindən keçmək tövsiyə olunur.