"Məqsədim bütün turnirlərdə həmişə qızıl medal qazanmaq olub. Bu gün də bunu bacardığım üçün özümlə fəxr edirəm. Çəkilən əziyyətin bəhrəsini görmək çox gözəl duyğudur".

Turaztv.az xəbər verir bu sözləri AZƏRTAC-a açıqlamasında gimnastikanın tamblinq növü üzrə 20-ci ölkə birinciliyi və Bakı çempionatında birinci yeri tutan Azərbaycan millisinin üzvü Aleksey Karataşov deyib.

Gənclər kateqoriyasında çıxış edən idmançı yarışa yüksək səviyyədə hazırlaşdığını bildirib: "Məşqçilərimiz bizi yarışa ən yaxşı şəkildə hazırladılar. Ona görə də turnir mənə görə əla keçdi. Çıxışımdan da razı qaldım. Bu gün müxtəlif elementlər nümayiş etdirdim. Heç birində ciddi səhvə yol vermədim. Nəticədə fəxri kürsünün ən yüksək pilləsinə qalxdım".

A.Karataşov növbəti hədəfinin gələn il keçiriləcək Dünya Kubokunda ilk növbədə finala yüksəlmək olduğunu söyləyib.