İnsanlıq yaranandan məlumatlara, xəbərlərə ehtiyac həyatımızın ayrılmaz hissəsi olub.
Müxtəlif elm sahələrinin yaranması həyatın və zehni inkişafın təməli olub.
Artıq elə bir dövrə gəlib çatmışıq ki, insanların çoxu süni intellektə üz tutur. Nə bilmək istəyirlərsə, ondan soruşurlar.
Bəs süni intellekt kimdir?
Onu da insanlar yaradıb.
Təəssüf ki, bununla da tənbəllərin sayı daha da artıb.
Süni intellekt bir çox problemləri həll edə bilər, amma qəlbinizdəki düşüncələri, hissləri görə bilməz.
Bunları paylaşmaq istədikdə isə özümüz yazmalıyıq. İnsanların qəlbinə yaxın olmaq üçün də onların söhbətlərini, fikirlərini eşitmək, oxumaq istəyirik.
On beş yaşımdan bəri öyrəndiyim məlumatları yazmaq, paylaşmaq həvəsi, arzusu ilə yaşamışam. Uzun illərdir qəlbimdən keçən duyğular, fikirlər, məsləhətlər də maraq dünyasında öz yerini tapıb.
Yazılarıma qarşı etirazlarla heç vaxt qarşılaşmasam da, müsahibə almaq dövrümə son versəm də, öyrəntilərə son vermək mümkün deyil. Öz övladlarımdan belə yeni öyrəndiklərim var.
Fikirləri ilə razılaşmadığım yazarlar da sonsuzdur.
Ömür boyu oxuyub öyrəndiklərimin bir çoxu da həm qorxunc, həm də sevindirici dəyişiklərlə üzləşir.
Bunun ilk səbəblərindən biri süni intellekt, digəri isə narkomaniyanın amansız inkişafıdır...
Əslində, trilyonları ilə kef edənlərlə, yoxsulluqdan, aclıqdan ölənlərin olduğu bu dünyada problemlər, dərdlər saysızdır.
Kasıbın da, varlının da ruhi dünyasına ağrı gətirən ölüm də var.
Allahımız bütün çətinliklərə qarşı səbri, təmkini, ümidi də qəlbimizdən əskik etmir. Hətta Allaha inanmayanların da qəlbindən...
Nə edirik?
Yaşayırıq — sevinclə, kədərlə, sevdiklərimizlə, iş-gücümüzlə, əyləncəmizlə və qəlbimizdəkiləri paylaşmaqla.
Bu paylaşımlardan qazandıqlarımız hər zaman xeyirli olsun, onların hərarətinə qızınaq, onlardan da nələrsə öyrənək, sevinək.
Tək özümüzü düşünməyək...
Öyrənək, öyrədək, dözək, yaşayaq.
Bu imtahan dünyasında ən gözəl əməl kimisə sevindirməkdir. Bir kəlmə xoş söz belə bütün əməllərin zirvəsində dayanır.
Fikirlərimizi yazaq, yaza bilməyənlər danışsın.
Və ən böyük arzum da odur ki, ətrafımızda bizi başa düşənlər olsun ancaq.
Pisliklər də, pislər də dünya durduqca olacaq — yaxşıların qiymətini bilmək üçün.
Yaradılan süni insanlar da belə oldu...
Qəlbimizə hakim isə özümüzük.
Yazın, paylaşın, məsləhət alın. Onu rahat saxlayaq.