İnsan həyatı yol kimidir. Kiminin yolu uzun, kiminin yolu qısa olur. Kimi tələsərək, sanki hər şeyi tez görmək, tez yaşamaq istəyirmiş kimi addımlayır. Kimi isə asta gedir, hər addımında dayanır, həyatın ləzzətini duymaga çalışır. Amma nəticə dəyişmir – hər kəs eyni sonluğa, torpağa doğru gedir...
Hamımız bir səmtə doğru irəliləsək də, yolumuz bir-birindən fərqlidir. Kimisi yolda iz qoyur, xatirə buraxır, kimisi səssizcə keçir və yox olur.
Amma hamının yükü eynidir – zaman yükü, həyat yükü, ölümə məhkumluq yükü...

Bu həqiqəti dərk edən insan boşuna yaşamaz. O, addımlarının sürətinə yox, addımlarının dəyərinə fikir verər...
Elə bu günlər- yaşı, yerişi, ləngliyi qınaq olunan fenomen yazıçımız Anar kimi...
Sən - Anar ömrü yaşamalı, Anar yerişi yeriməlisən ki onu duyasan, dərk edəsən...
Sən Anarın yaşını qınayırsansa, demək Allahını qınayırsan...
O, yaradıcıdır və onu yaradan uca varlıq bir missiya eşqinə yaradıb.
Ömrünün 70 ilini yazıya həsr edən kəs ağır addımlayar, ləng gedər. Çünki hər addımında qələminin izi, hər baxışında min səhifəlik xatirə var. Onun addımlarında tələsmək yox, dayanıb ötənləri anmaq var...
Yaradıcı insanın ömür, yolu sanki bir dağ yolunu andırır. Zirvəyə qalxmaq üçün tər tökür, zəhmət çəkir, iradə göstərir. Zirvəyə yaxınlaşdıqca nəfəs daralır, addımlar ağırlaşır, Anar kimi...
Amma zirvəyə çatan o insan bilir ki, arxada qoyduğu izlər, dediyi kəlamlar, yazdığı əsərlər başqalarının yolunu işıqlandıracaq. Onun yavaşlaması, əslində, qürurla seyr etdiyi bir mənzərədir. Bilir ki, arxada qalan nəhəng, solmaz, həmişəyaşıl söz bağı var, Anar kimi..
Sanki o, hər addımı ilə yazdığı minlərlə səhifənin yükünü daşıyır, hər sözü ilə illərin zəhmətini, müdrikliyini aparır. Belə insanın yerişi ləng olur, izi dərin, Anar kimi...
Ləngliyi yorğunluq yox, dərinlikdəndir. Çünki ağır-ağır düşünür, ölçüb-biçir, tələsmir...
Onun asta addımları, illərlə çəkdiyi zəhmətin, gecələrini fəda etdiyi yaradıcılığın təntənəsidir. Bəlkə də cismi yorulub, lakin qələminin izi daim gəncdir.
Ömrünü sözə həsr edən hər kəs, əslində, özü ləng getsə də, sözü ilə əsrləri ötür, Anar kimi...
Bütün yaradıcı, duyğulu insanlara ləng gediş, müdrik zirvə nəsib olsun, Anar kimi...
Həyatın ən böyük sirri də bundadır. Müdrikliklə yazdığı kəlamı kimi:
"Gəlimli-gedimli dünya,
Son ucu ölümlü dünya"