İraqın paytaxtı Bağdadda beynəlxalq hava limanının yaxınlığına edilən raket zərbələri nəticəsində ən azı səkkiz nəfər ölüb.
Bu barədə “AFP” agentliyi İraq təhlükəsizlik qüvvələrindəki mənbəyə istinadən məlumat yayıb.

Qeyd olunur ki, üç raket yüklərin yerləşdiyi əraziyə düşüb, nəticədə iki maşın partlayıb. Raketlərdən biri uçuş-eniş zolağına düşüb ki, bu da hava limanının bağlanmasına gətirib çıxarıb.

“Əl-Ərəbiyyə”, “Əl-Cəzirə” və “Sky News” telekanallarının verdiyi məlumata görə, Bağdad hava limanına endirilən raket zərbələri nəticəsində İran İnqilabı Keşikçiləri Qvardiyasının (“Sepah”) “Quds” xüsusi bölməsinin rəhbəri, general Qasım Süleymani öldürülüb.

“Sky News” agentliyi bildirir ki, ABŞ Bağdadda İranla bağlı iki hədəfə zərbə endirdiyini təsdiq edib.

***

Tehran İran İnqilabı Keşikçiləri Qvardiyasının (İİKQ) “Quds” xüsusi bölməsinin rəhbəri, general Qasım Süleymaninin İraqda qətlə yetirilməsinə görə intiqam alacaq.

Bu barədə Məqsədəuyğunluq Şurasının katibi Mohsen Rezaye özünün “Twitter” hesabında bildirib.

“Şəhid kimi vəfat edən Qasım Süleymani qardaşlarına qoşulub, ABŞ-dan qisas alacağıq”, - deyə Rezaye yazıb.

Daha öncə bildirilmişdi ki, Süleymani Bağdad hava limanında İraqın şiə qoşunlarının komandan müavini əbu Məhdi əl-Muhəndislə görüşü zamanı aviazərbə nəticəsində qətlə yetirilib. Zərbəyə görə məsuliyyəti ABŞ üzərinə götürüb, Tehran yüksək rütbəli hərbçinin həlak olduğunu təsdiqləyib.

Qeyd edək ki, ABŞ tərəfi əl-Muhəndisi Amerika səfirliyinə hücumda ittiham edir. (oxu.az)