“Elə adama fəxri ad veriblər ki... Məsələn, Aygün Kazımovaya. Deyir ki Prezidentin verdiyi evi qarderob etmişəm. Aygün Kazımova, bu cür hərəkət etmək olar? Deməkdən ki, Prezidentin verdiyi evi tarixi muzey edirəm, nəyi də satsam da o evi satmaram, deyir, qarderob etmişəm. Şəxsən mən olsaydım, Aygünün evini əlindən alıb ya şəhid ailəsinə, ya da qaziyə verərdim, deyərdim ki, sənə düşmür o ev. Eləcə də fəxri adı da ondan alardım”.

Bu sözləri Əməkdar artist Cavanşir Məmmədov Musavat.com-a açıqlamasında deyib.

Əməkdar artist uzun illərdir ki, Xalq artisti fəxri adını ala bilməməsindən şikayətlənib: “Firuzə İbadova və mən 50 ildir ki, səhnədəyik, lakin nə fəxri ad, nə ev, nə də təqaüd ala bilirik. Mənim indi 70 yaşım var, bəs nə vaxt fəxri ad verəcəklər? Axı mən də xidmət etmişəm. Bəyəm toya getmək xidmət etmək demək deyil? Toya özün getmirsən ki, səni dəvət edirlər. Yaxşı sənətçi olmasan, səni kim toya dəvət edər? Elə adam da var ki, 2-3 dəfə ev alıb. Bəs onda Firuzə İbadovaya, Cavanşir Məmmədova niyə ev verilməməlidir? 17 il adam Əməkdar artist kimi qala bilər?”
Cavanşir Məmmədova dolanışığından da gileylənib: “Əməkdar artist kimi ayda 100 manat pul alıram. Üstəlik toylar da yoxdur. Bəs mən nə ilə dolanım?”