Xatirə İsnmayılova,
şəhid anası

Uşaq olanda yeni insanları tanımaq bizə maraqlı gələrdi. Hər kəsi tanımaq üçün can atardıq.Uşaq boyumuzla yuxarı baxanda üzündə təbəssüm gördüyümüz hər insanı yaxşı sanardıq.Elə bilərdik ki,insanların hamısının qəlbi saf , niyyəti təmizdir.
Böyüdükcə insanları tanıdıq….
Tanıdıqca anladıq ki ,hər gülən üzün arxasında xeyirxah əməl , hər deyilən sözün arxasında səmimiyyət dayanmır.Bəzən ən güvəndiyin insanlar səni incidir, ən gözəl sözlər ən çirkin əməlləri pərdələmək üçün istifadə oluna bilir.
Və bir zaman gəlir ki , insanlardan qaçmağa , öz təkliyinə və öz tənhalığına sığınmağa başlayırsan.
Amma müdrikləşdikcə başqa bir mərhələyə keçirsən….
Artıq heç kəs səni təəccübləndirmir.Nə insanların pisliyi , nə nankorluğu , nə anlamamazlığı ..
Anlayırsan ki , hər kəsin özünəməxsus xarakteri , xisləti var.Sən istəsən də, istəməsəndə bu belədir…
Anlayırsan ki ,kim içində nə daşıyırsa sənə onu da təqdim edir.
Və bir gün görürsən ki ,səni vaxtı ilə incidən , qəlbini qıran davranışlar sənə boş , mənasız və gülünc gəlir.
Anlayırsan ki , özün artıq bütün bunları qavrayacaq qədər böyümüsən , müdrikləşmisən.
Və bir də anlayırsan ki ,kiminsə pisliyinin sənin ruhunu bulandıracaq qədər təsiri qalmıyıb.
Bəlkə də böyümək insanlardan qaçmaqdır,müdrikləşmək isə hər kəsi olduğu kimi qəbul edib yoluna davam etməkdir.
Haşıyə: Mən balaca olanda yanımda olan uşaqları göstərib deyərdim ki , bunlar mənim dostumdur. Anam isə qaşlarını çatıb deyərdi ki , insanın heç vaxt çox dostu olmur , dost ya bir olar ya iki… Anlamazdım anamı , hətta ürəyimdə etiraz da edərdim…
Böyüdükcə anladım ki , dostluq üçün çox sınaqlardan keçmək lazımdır … Dostluq qazanmaq ,işlətmək həqiqətən asan iş deyil..
Bir də nənəm rəhmətlik deyərdi : Bala, kim səndən nə soruşsa , “salam “, “sağ ol “,”bilmirəm” de , bu üç kəlmədən başqa heç nə ..
indi artıq nənəmi də çox yaxşı anlayıram …
Hə , həyat ən amansız müəllimdir, öyrətdiklərinin əvəzində ömründən - günündən pay alır.
Ona görə də böyümüş böyüklərə də qulaq asmaq lazımdır.
Allah köməyimiz olsun !