Xatirə İsmayılova
İctimai Şuranın sədri,
şəhid anası


Əhalinin sağlamlığının qorunması Azərbaycan Respublikasında həyata keçirilən dövlət siyasətinin əsas prioritet istiqamətlərindən biridir. Son illərdə ölkəmizdə səhiyyə infrastrukturunun müasirləşdirilməsi, yeni tibb müəssisələrinin tikintisi və mövcud müəssisələrin əsaslı yenidən qurulması istiqamətində həyata keçirilən ardıcıl tədbirlər nəticəsində vətəndaşların keyfiyyətli və əlçatan tibbi xidmətlərdən istifadə imkanları əhəmiyyətli dərəcədə genişlənmişdir.
Abşeron Rayon İcra Hakimiyyəti yanında İctimai Şuranın sədri kimi vətəndaş qəbullarında və ictimai dinləmələrdə iştirak edərkən sakinlər tərəfindən ən çox səsləndirilən müraciətlərdən birinin yaşayış məntəqələrində ilkin səhiyyə xidmətlərinin genişləndirilməsi və müasir tibbi xidmətlərin əlçatanlığının təmin edilməsi ilə bağlı olduğunu müşahidə edirik. Rayon əhalisinin sürətlə artması fonunda Abşeron Rayon Mərkəzi Xəstəxanasına müraciət edən vətəndaşların sayının əhəmiyyətli dərəcədə çoxalması yaşayış məntəqələrində yeni ailə sağlamlıq mərkəzlərinin yaradılmasını zərurətə çevirmişdir.
Aşağı Güzdək Ailə Sağlamlıq Mərkəzinin yeni binasının istifadəyə verilməsi bu baxımdan xüsusi əhəmiyyət kəsb edir. Yeni tibb müəssisəsi bir tərəfdən Abşeron Rayon Mərkəzi Xəstəxanasının iş yükünün azalmasına mühüm töhfə verəcək, digər tərəfdən isə sakinlərin yaşadıqları ərazidə, əlavə vaxt itkisinə və uzaq məsafə qət etməyə ehtiyac olmadan keyfiyyətli ilkin tibbi xidmət almalarına geniş imkan yaradacaqdır. Bu isə səhiyyə xidmətlərinin səmərəliliyinin artırılmasına və vətəndaş məmnunluğunun daha da yüksəlməsinə xidmət edəcəkdir.
Fürsətdən istifadə edərək, ölkəmizdə səhiyyə sahəsinin inkişafına, müasir tibbi infrastrukturun yaradılmasına və vətəndaşların sağlamlığının etibarlı qorunmasına göstərdiyi davamlı diqqət və qayğıya görə Azərbaycan Respublikasının Prezidenti cənab İlham Əliyevə dərin minnətdarlığımı bildirirəm. Prezident cənab İlham Əliyevin rəhbərliyi ilə həyata keçirilən uğurlu sosial siyasət nəticəsində respublikamızın bütün bölgələrində, o cümlədən Abşeron rayonunda müasir səhiyyə müəssisələri istifadəyə verilir, tibb infrastrukturunun maddi-texniki bazası gücləndirilir, əhaliyə göstərilən tibbi xidmətlərin keyfiyyəti və əlçatanlığı ildən-ilə artırılır. İnsan amilinin dövlət siyasətinin mərkəzində dayanması səhiyyə sahəsində əldə olunan mühüm nailiyyətlərin əsasını təşkil edir.
Eyni zamanda, bu mühüm layihənin həyata keçirilməsində əməyi olan Azərbaycan Respublikasının Səhiyyə Nazirliyinə, TƏBİB-in rəhbərliyinə, Abşeron Rayon İcra Hakimiyyətinə, Abşeron Rayon Mərkəzi Xəstəxanasının kollektivinə, layihənin icrasında iştirak edən bütün qurumlara və fədakar səhiyyə işçilərinə rayon ictimaiyyəti adından səmimi təşəkkürümü bildirirəm.
Aşağı Güzdək Ailə Sağlamlıq Mərkəzinin kollektivinə gələcək fəaliyyətlərində uğurlar arzulayır, əminliyimi ifadə edirəm ki, bu müasir səhiyyə müəssisəsi uzun illər ərzində rayon sakinlərinin sağlamlığının keşiyində dayanacaq, göstərilən tibbi xidmətlərin keyfiyyətinin daha da yüksəldilməsinə və dövlətimizin həyata keçirdiyi uğurlu səhiyyə siyasətinə layiqli töhfə verəcəkdir.