✍ Sevil Azadqızı
Azərbaycan dili və ədəbiyyatı müəllimi.
Filoloq. Ədəbi təhlil-tənqidçi. Yazar-publisist.

Bəzən insanın taleyi elə yazılır ki, o həm ürəkləri əməliyyat masasında xilas edir, həm də sözün sehri ilə qəlbləri sağaldır. Türkiyədə yaşayan, ürək və damar cərrahiyyəsi sahəsində böyük təcrübəyə malik olan Prof. Dr. Hüseyin Şaşkın məhz belə nadir şəxsiyyətlərdəndir. O, təkcə tibbi bilik və bacarığı ilə deyil, həm də poetik duyumu ilə seçilən ziyalı obrazıdır. Onun həyat yolu elm və sənətin paralel axarında formalaşıb, bir tərəfdə skalpelin dəqiqliyi, digər tərəfdə sözün incəliyi dayanır.
Ürək cərrahı olmaq, sadəcə bir peşə deyil, böyük məsuliyyət və mənəvi güc tələb edən bir missiyadır. İnsan həyatının ən həssas nöqtəsinə toxunan bir həkim, şübhəsiz ki, ruhun da incə qatlarını anlayır. Hüseyin Şaşkın əməliyyat otağında ürəyi dayanan bir bədəni yenidən həyata qaytararkən, eyni zamanda insanın yaşamaq eşqini də qoruyur. Bu həssaslıq onun şeirlərinə də sirayət edir. “Cerrahi” təxəllüsü ilə qələmə aldığı misralar sanki həyatın faniliyini, sevginin əbədiliyini və insanın Yaradan qarşısındakı təvazökarlığını ifadə edir. Onun “Şikayətim Yok” adlı şeirindəki səmimiyyət, razılıq və qəlb rahatlığı, bir həkimin taleyə və həyata baxışının poetik etirafıdır. Orada şikayətsizlik təslimçilik deyil, şükür və kamillik mərhələsidir.

Onun yaradıcılığına nəzər saldıqda aydın görünür ki, bu şeirlər təsadüfi duyğuların deyil, həyatın dərin müşahidəsinin məhsuludur. Hər gün ölüm və həyat arasında qərar verilən bir məkanda çalışan insan üçün söz artıq sadə ifadə vasitəsi deyil, ruhun nəfəsidir. Şaşkının şeirlərində sevgi ilahi bir bağ kimi təqdim olunur, insan münasibətləri isə mərhəmət prizmasından işıqlandırılır. Bu işıq, əməliyyat otağının soyuq işığından fərqli olaraq, qəlbi isidən və ümid verən bir nurdur.
Elm ilə sənətin vəhdəti hər kəsə nəsib olmur. Çoxları ya rasional düşüncənin sərt çərçivəsində qalır, ya da duyğuların axarında itir. Hüseyin Şaşkın isə bu iki sahəni bir araya gətirərək bütöv bir şəxsiyyət modeli ortaya qoyur. Onun həyat hekayəsi göstərir ki, ürəyə toxunmaq üçün bəzən cərrahi dəqiqlik, bəzən də poetik zəriflik lazımdır. Həkim kimi o, insanın fiziki ağrısını azaldır, şair kimi isə mənəvi boşluğunu doldurur. Bu isə nadir bir harmoniyadır.
Bu gün onun doğum günündə belə bir insanın varlığına şükür etməmək mümkün deyil. Həyatını insanlara həsr edən, ürəklərə şəfa, sözlərə can verən bir ziyalının ömür yolu hər cür ehtirama layiqdir. Doğum gününüz mübarək olsun, dəyərli Hüseyin hoca. Uca Yaradan sizə sağlam, uzun və bərəkətli bir ömür nəsib etsin. Əlləriniz daim şəfa gətirsin, qələminiz heç vaxt susmasın. Ürəyiniz necə mərhəmət və sevgi ilə doludursa, həyatınız da elə nur və səadətlə dolsun. Yeni yaşınız sizə daha böyük uğurlar, daha dərin ilham və daha çox insanın duasını qazandırsın. Siz həm əməliyyat masasında, həm də misralarınızda insanlara həyat verən nadir şəxsiyyətlərdənsiniz və bu dəyər hər zaman qorunsun. Doğum gününüz mübarək olsun!
20.02.2026