Çin və ABŞ-dan olan beynəlxalq tədqiqatçılar qrupu müəyyən edib ki, çayın müntəzəm istehlakı qaraciyər xərçəngi riskini azaldır.

Turaztv.az AZƏRTAC-a istinadən xəbər verir ki, böyük araşdırmanın nəticələri “Nutrients” jurnalında dərc olunub. Tədqiqatda 2 mindən çox qaraciyər xərçəngi diaqnozu qoyulmuş xəstə və təxminən 8 min sağlam insan iştirak edib.

Alimlər iştirakçıların həyat tərzini, o cümlədən çay içmə, siqaret çəkmə, spirtli içkilərədən istifadə vərdişlərini, hepatit B və C virusunun mövcudluğunu və içməli suyun keyfiyyətini müqayisə ediblər. Məlum olub ki, tədqiqat zamanı çay içməyə davam edən şəxslərin qaraciyər xərçəngi riski içməyənlərlə müqayisədə 49 faiz azdır. Maraqlıdır ki, çay içməyi dayandıranlarda risk orta göstəricidən yüksək çıxıb.

Effekt digər risk faktorlarından asılı olmayaraq, həm hepatit B daşıyıcısı olanlarda, həm də olmayanlarda, həm siqaret çəkənlərdə, həm də spirt qəbul edənlərdə özünü biruzə verib. Xüsusilə spirt istifadəçilərində çayın qoruyucu təsiri diqqətəlayiq olub. Onlarda xərçəng riski təxminən yarıya qədər azalıb. Alimlər hesab edirlər ki, çaydakı antioksidantlar və polifenollar bu prosesdə əsas rol oynaya bilər.

Tədqiqatçılar vurğulayırlar ki, çay mütləq sübut olunmuş profilaktik tədbirlər olan hepatit B-yə qarşı peyvənd, spirt içkilərin istifadəsinin dayandırılması və təmiz sudan istifadənin yerini vermir. Lakin müntəzəm çay istehlakı, xüsusilə yüksək risk qrupuna aid insanlar üçün, xəstəliyin riskini azaltmaq yolunda əlavə və əlçatan vasitə ola bilər.