Azərbaycanda ötən il çəki problemi olan şəxslərin sayı kəskin artıb. Ölkədə bədən çəkisinin orta əmsalı 30-dan yuxarı olan minlərlə vətəndaş qeydə alınıb.

Demokrat.az xəbər verir ki, dövlət qurumlarının rəsmi hesabatına əsasən 2025-ci ildə 814 mindən çox insanın çəkisi normadan artıq olub. Bu göstərici 15 yaş və yuxarı əhali qrupunu əhatə edir. Ölkə üzrə kişilərin 9,3 faizi bu problemdən əziyyət çəkir. Qadınlar arasında isə analoji rəqəm 10,6 faiz təşkil edir.

Yaş qrupları üzrə aparılan araşdırmalar fərqli statistikanı ortaya çıxarıb. Gənclər arasında çəki problemi daha aşağı səviyyədə qeydə alınıb. Belə ki, 15–19 yaşlı yeniyetmələrin cəmi 0,7 faizində artıq çəki aşkarlanıb. Bu yaşda olan oğlanların 0,5 faizi, qızların isə 0,8 faizi piylənmədən əziyyət çəkir.

Növbəti yaş qruplarında rəqəmlər yüksələn xətt üzrə davam edir. Rəsmi statistikaya görə 20–44 yaşlı əhali arasında piylənmə səviyyəsi 4,3 faizdir. Maraqlıdır ki, bu yaşda kişilər qadınları qabaqlayır. Kişilərdə göstərici 5,5 faiz, qadınlarda isə 3,1 faiz olub.

Orta yaşlı nəsil arasında vəziyyət daha ciddi xarakter alıb. Ölkədə 45–64 yaş qrupunda olan şəxslərin 16,4 faizi artıq çəkilidir. Bu qrupda kişilərin 15,2 faizi, qadınların isə 17,6 faizi piylənmə problemi ilə qarşılaşıb.

Ən yüksək göstəricilər isə yaşlı əhali arasında qeydə alınıb. 65 və yuxarı yaşlı vətəndaşların 19,3 faizində kəskin çəki artımı var. Bu yaşda kişilərin 15,3 faizi, qadınların isə 22,6 faizi piylənmədən əziyyət çəkir. Araşdırmalar göstərir ki, problem yaş artdıqca daha da dərinləşir.(report)

Demokrat.az