Noyabrın 12-də Milli Məclisin Ailə, qadın və uşaq məsələləri komitəsinin sədri Hicran Hüseynova ölkəmizdə səfərdə olan Türkiyə Böyük Millət Məclisinin Qadın və kişi bərabərliyi komitəsinin sədri Tülay Kaynarca ilə görüşüb.

Parlamentin Mətbuat və ictimaiyyətlə əlaqələr şöbəsindən AZƏRTAC-a bildirilib ki, Hicran Hüseynova həmkarını salamlayaraq, Azərbaycanla Türkiyə arasında münasibətlərin əsl qardaşlıq ruhuna dayandığını diqqətə çatdırıb. Bildirilib ki, Türkiyə 44 günlük Vətən müharibəsinə siyasi-mənəvi dəstək verərək yanımızda oldu və bütün dünyaya bu qardaşlığın həmişə davam edəcəyini göstərdi.

Həmçinin qeyd edilib ki, iki qardaş ölkə arasında bir millət, iki dövlət olaraq çox sıx münasibətlər qurulub. Prezident İlham Əliyevin və Türkiyə lideri Rəcəb Tayyib Ərdoğanın şəxsi dostluq münasibətləri dövlətlərimiz arasındakı birliyin yüksək səviyyəyə çatmasında mühüm rol oynayır.

Hicran Hüseynova qeyd edib ki, Azərbaycan Milli Məclisi və Türkiyə Böyük Millət Məclisi xalqlarımız arasında münasibətlərin ruhuna uyğun olaraq, əlaqələri uğurla inkişaf etdirirlər. Həmçinin parlamentlərimiz arasında qarşılıqlı səfərlərin və görüşlərin artırılması olduqca mühümdür.

Daha sonra isə komitələr arasında fikir mübadiləsi aparılaraq, görülən işlər haqqında ətraflı danışılıb və gələcəkdə də əməkdaşlığın daha da gücləndirilməsi üçün birgə fəaliyyət istiqaməti müəyyən edilib.