İyulun 3-də Ermənistan işğal zamanı Füzuli və Zəngilan rayonlarında basdırılmış tank və piyada əleyhinə təqribən 92 min minanın xəritələrini Azərbaycana verdi. Ağdam rayonundan sonra Füzuli və Zəngilanda minalanmış ərazilərin xəritələrinin alınması Prezident İlham Əliyevin uzaqgörən xarici siyasətinin və diplomatiyamızın növbəti uğuru kimi dəyərləndirilməlidir.

Bunu AZƏRTAC-açıqlamasında Milli Məclisin deputatı Tamam Cəfərova deyib.

Mina xəritələrinin təqdim olunmasının məskunlaşma prosesinin proqnozlaşdırıldığından daha qısa müddətə rellaşacağına imkan verəcəyini söyləyən deputat bildirib: “Hazırda bərpa və yenidənqurma işləri üçün ən ciddi əngəllərdən biri məhz işğal dövründə həmin ərazilərdə ermənilər tərəfindən kifayət qədər çox sayda minaların basdırılmasıdır. Xəritələrin təqdim edilməsi ərazilərin minalardan təmizlənməsini sürətləndirməklə yanaşı, infrastruktur işlərinin gedişinə də müsbət təsir göstərəcək. Bu, məcburi köçkünlərin doğma torpaqlarına qayıdışı prosesinə və infrastruktur layihələrinin reallaşmasına təkan verəcək.

Eyni zamanda, minaların xəritəsinin Azərbaycana verilməsi onların aşkarlanması üçün sərf olunan xərclərin azalmasına gətirib çıxaracaq. Ermənistan bir müddət bundan əvvəl 15 əsir qarşılığında Ağdamın minalanmış ərazilərinin xəritələrini Azərbaycana vermişdi. Füzuli və Zəngilanda 92 min mina ilə bağlı xəritələrinin əldə olunması həmin uğurun davamıdır”.

Füzulidə beynəlxalq hava limanının, Şuşaya gedən Zəfər yolunun inşasından və “ağıllı kənd”lərin salınmasından söz açan T.Cəfərova kənd təsərrüfatı layihələrinin həyata keçiriləcəyi Füzuli və Zəngilanın strateji əhəmiyyətini xüsusi vurğulayıb. O deyib: “Hazırda Ağdamdan sonra ən böyük infrastruktur layihələri Füzuli rayonunda həyata keçirilir. Burada yeni hava limanı, dəmir yolu xətləri və avtomobil yolları inşa olunur. Bu baxımdan Füzuli xüsusi strateji əhəmiyyət kəsb edir. Xəritələrin əldə olunması bu layihələrin daha tez zamanda icra olunmasına böyük töhfə verəcək".

Deputat, həmçinin vurğulayıb ki, ən vacib məsələlərdən biri xəritələrin əldə edilməsi ilə insan itkisinin qarşısının alınmasıdır. Çünki son bir neçə ayda 100-dən çox azərbaycanlı bu minaların qurbanına çevrilərək həyatını itirib və ya yaralanıb.

“Xatırlatmaq istərdik ki, torpaqlarımız işğaldan azad edildikdən sonra Ermənistan tərəfindən minalanmış ərazilərin xəritələrinin verilməməsi ilə bağlı yeni bir təhlükə yaranmışdı. Əvvəlcə ermənilər belə xəritələrin olmadığını bildirdilər, sonra isə onları verməkdən tamamilə imtina etdilər. Lakin sonradan ölkəmiz Ağdam rayonunda basdırılmış 97 min minanın xəritəsini əldə edə bildi”, - deyə deputat qeyd edib.