Portuqaliya Prezidenti Antoniu Joze Sequru ifrat sağçıların təşəbbüsü ilə qəbul edilən və üzü tam qapayan örtük taxan müsəlman qadınları hədəf alan qanunu imzalayıb. Qanun ictimai yerlərdə üzün gizlədilməsini qadağan edir.

"Turaztv.az" "Unikal" -a istinadən xəbər verir ki, bu barədə dövlət başçısı çərşənbə axşamı yayımlanan bəyanatda bildirib.

"Üz insan kimliyinin və ünsiyyətinin əsas elementi hesab edilməlidir", - deyən keçmiş Sosialist Partiyasının lideri bununla yanaşı etiraf edib ki, söhbət "böyük sosial və mədəni həssaslığa malik" bir mövzudan gedir.

Yerli medianın "burka qanunu" adlandırdığı sənədin yekun variantı ötən ilin iyulunda parlament tərəfindən hakim sağ koalisiya və ifrat sağçıların səsləri ilə qəbul edilib. Solçu partiyalar isə qanunun əleyhinə səs veriblər.

Qanun ictimai məkanlarda üzü gizlətmək və ya şəxsin tanınmasına mane olmaq məqsədi daşıyan geyimlərin geyinilməsini, həmçinin xüsusilə cinsiyyət, din, yaş və ya mənşə ilə bağlı səbəblərlə hər hansı bir şəxsin üzünü örtməyə məcbur edilməsini qadağan edir.

Qanunu pozan şəxslər 150 avrodan 3000 avroyadək cərimələnə bilər. Bununla yanaşı, tibbi səbəblər, peşə fəaliyyəti, bədii məqsədlər və ya iqlim şəraiti, habelə ibadət yerləri, diplomatik nümayəndəliklər və təyyarələrdə üzün örtülməsi ilə bağlı istisnalar nəzərdə tutulur.