Xəbərlər
4.08.2026, 07:36
ŞUŞAM... "Zərif kölgələr"ədəbi klubu ilə Şuşanı ziyarət etdik...
Dəyəndə yad ayaqlar ətəyinə, yalına,
Sanki yarımcan idim, əskik bir yanım, Şuşam.
Yağı xəncər çəkəndə əzəmət, cəlalına,
Deyirdim bu ağriya necə dayanım, Şuşam,
Haqqa açılmış qolum, ürəyim, canım, Şuşam.
Qeyrətinə qurban el, igid ərənlər, ərlər,
Keçilməz səngər olan, ər oğlu ər nəfərlər,
Siz torpağa döndünüz, doğulanda zəfərlər,
Şəhidiylə yoğrulan, bir olan, qanım, Şuşam,
Haqqa açılmış qolum, ürəyim, canım, Şuşam.
Qayalar arasında, Pənahabadım, qalam,
Sən tanrıdan ərməğan, sən tanrıya bir salam.
Sən əbədi mirasım, sən babalardan qalan,
Möhürləndi səninlə bu gün ad-sanım Şuşam,
Haqqa açılmış qolum, ürəyim, canım, Şuşam.
Nətavanım, Vaqifim iz qoydu diyar-diyar,
Nəğmələrdən doğuldu, Xan oldu İsfəndiyar.
Cabbarımı söyləyim, ya Nəvvabı? – az olar!
Muğamatım, təsnifim, tarım, kamanım, Şuşam,
Haqqa açılmış qolum, ürəyim, canım, Şuşam.
Göz ilə görünməyən ruhların yurd, yaylağı,
Mələklər toplanan yer, bəlkə çayı, çaylağı,
Sən nağıllar aləmi, pərilərin oylağı,
Ay nurunda çimənim, ulduz sayanım, Şuşam,
Haqqa açılmış qolum, ürəyim, canım, Şuşam.
Gecə həzin, göy bəyaz, ulduzlar çiyid-çiyid1,
Buludlar əlçim-əlçim, hər duyğusu bir öyüd.
Pıçıltısı layladı, telləri salxım söyüd,
Möcüzənə bələnim, uyum, oyanım Şuşam,
Haqqa açılmış qolum, ürəyim, canım, Şuşam.
22.07.2024
1 çiyid -pambıq toxumu, burada dən-dən
Son xəbərlər
Ən çox oxunanlar
- Bu gün
- Bu həftə
- Bu ay
