DÜNYA MƏNƏ DAR GƏLİR - Murad Məhərrəmov

Xəbərlər

4.01.2022, 22:58

DÜNYA MƏNƏ DAR GƏLİR - Murad Məhərrəmov

DÜNYA MƏNƏ DAR GƏLİR
Nə tez ötdü günüm, ayım, illərim,
Solub getdi çəmənimdə güllərim,
Tellərinə toxunmaz ki əllərim,
Daha sevmək, sevilmək də ar gəlir,
Dünya mənə niyə belə dar gəlir?!
******
Başım üstən ötüb keçdi durnalar,
Arxasınca gözlərimdən qan damar,
Daha yolum kələ- kötür, nahamar,
Gül bağçamda tikan bitir, xar gəlir,
Dünya mənə niyə belə dar gəlir?!
******
Nə verdi ki, sonsuz arzu, ümidlər?
Qalan qaldı, gedənlər də gediblər.
Əyib yerə başın salxım söyüdlər,
Gözüm yolda, qəlbə ahu-zar gəlir,
Dünya mənə niyə belə dar gəlir?!
******
Dost-tanışı qəlbə yaxın bilmişəm,
Namərdini ürəyimdən silmişəm,
Pərdə üstə bir sarıca simmişəm,
Köksüm üstə kökdən düşən tar gəlir,
Dünya mənə niyə belə dar gəlir?!
******
Doğmaların soyuqluğu izimdə,
Sınıb qanad, qançır olub dizim də,
Kim olar ki,mənim tabda, dözümdə,
Sönüb ocaq, külüm altda qor gəlir,
Dünya mənə niyə belə dar gəlir?!
******
Gözlərimdən qaçırıbdır yxumu,
Azım qalıb, əldən alıb çoxumu,
Sındırıbdır kamanımı, oxumu,
Ovlağıma tülək tərlan, sar gəlir,
Dünya mənə niyə belə dar gəlir?!
******
Hələ qəlbdə şirin dilək, xoş arzu,
Titrək əlim o qönçəyə tamarzı,
Könlüm məndən,mən könlümdən narazı,
Baharımdan payızıma yar gəlir,
Dünya mənə niyə belə dar gəlir?!
******
Yaşasam da kasıb koma, sarayda,
Mən sahildə, ömrüm qalıb o tayda,
Baxıb keçdim pəncərədən, nə fayda?
Göylərimdən piltə-piltə qar gəlir,
Dünya mənə niyə belə dar gəlir?!
******
Düşünürəm, qəmlənirəm hər səhər,
Dənizimdə mürgüləyir ləpələr,
Köksüm altda hələ şirin nəğmələr,
Çiçək açıb qönçələnir, bar gəlir,
Dünya mənə niyə belə dar gəlir?!

MURAD MƏHƏRRƏMOV