Zəfər Günü ərəfəsində doğma divarlar arasında "Böyük dəbilqə" kimi nüfuzlu yarışda medal qazandığım üçün sevinirəm.

Bu fikirləri AZƏRTAC-a açıqlamasında Bakıda keçirilən “Böyük dəbilqə” turnirində gümüş medal qazanmış Azərbaycan cüdoçusu Məmmədəli Mehdiyev (90 kq) deyib.

O, yarışda rəqiblərinin hamısının güclü olduğunu və qarşılaşmaların çətin keçdiyini qeyd edib. Yaponiya cüdoçularının xüsusilə ciddi rəqib olduqlarını bildirən idmançı onlardan birinə qalib gəlsə də, digərinə uduzduğunu vurğulayıb: "Yarışda hədəfim qızıl medal idi. Təəssüf ki, yaponiyalı idmançı ilə final qarşılaşmasında cüzi səhvə yol verdim və hakimlər üçüncü cərimə xalı verdilər.

M.Mehdiyev son iki ayda artıq üçüncü nüfuzlu yarışda iştirak etsə də, yorulmadığını deyib: “Əslində çox yaxşı formadayam. Baxmayaraq ki, son iki ay ərzində üçüncü nüfuzlu yarışda iştirak edirəm, qəti yorğunluq hiss etmirəm. Düzü, çəkisalma prosesi bir qədər ağırdır. Demək olar ki, 40 gün ərzində 20 kiloqramdan çox çəki salmışam. Hər yarışda 7 kiloqram çəki salıram. Bütün bunlara baxmayaraq formada idim və özümü yaxşı hiss edirdim. Hesab edirəm ki, bu gün mənim yox, yaponiyalı idmançının günü idi. əminəm ki, növbəti dəfə qələbə mənim olacaq".

Cüdoçu dizində zədəsi olduğunu və qarşıdakı iki ay ərzində boşluqdan istifadə edib onların müalicəsi ilə məşğul olacağını da diqqətə çatdırıb.